歐國盃坐冷板　荷蘭中堅答應投曼聯

正跟隨荷蘭角逐歐國盃嘅拜仁中堅馬菲斯迪歷特，至今4場都冇上陣，能夠騰出時間處理轉會，據報佢已答應曼聯轉會要求同個人條件，願意減薪過檔，只要同拜仁傾妥轉會費就可完成交易。

24歲嘅馬菲斯迪歷特係荷蘭陣中當打球員，但朗奴高文似乎唔太信佢，歐國盃用華基爾雲迪積克同迪維積打正選，後備換入雲迪雲，馬菲斯迪歷特就長坐冷板，係隊內唯一零上陣後衞，不過唔緊要，曼聯同坦哈格睇得起佢。

多間傳媒報道，馬菲斯迪歷特已答應曼聯轉會要求，並傾妥個人條件，據報佢將會減薪過檔，佢喺拜仁年薪為1,500萬歐元(約1.26億港元)，但曼聯年薪係1,200萬歐元(約1億港元)，足足少咗300萬歐元。

據報拜仁打算放人，不過有球迷群起反對，認為唔應該放走呢位頂級後衞，需要拜仁拆解，至於雙方約定轉會費大約為5,000萬歐元(約4.2億港元)。