拜仁追魂call斟荷蘭翼鋒　歐國盃後扑槌

荷蘭今屆歐國盃走靚線，4強在望，入決賽甚至奪冠都唔係冇可能，隊中球員亦廣受豪門關注，其中翼鋒沙維西蒙斯正式上位，交出3個助攻嘅佢，受到拜仁慕尼黑瘋狂斟介，球員打算踢完歐國盃先畀答覆。

沙維西蒙斯年僅21歲，巴塞青訓系統出身，之後轉到巴黎聖日耳門青訓，並拔提上一隊，期間曾轉投燕豪芬，上季重返巴黎聖日耳門後外借到RB萊比錫，小小年紀已經走遍法甲、荷甲、德甲3地。

近日沙維西蒙斯結束外借，現時係巴黎聖日耳門球員，至於留隊發展定繼續外借，暫時未有定論，依家受到拜仁垂青，如何選擇等歐國盃後揭盅。

轉會專家羅曼諾報道，沙維西蒙斯將於歐國盃後決定前途，今次交易球員意願是最大決定因素，據報拜仁為了簽下沙維西蒙斯，每日都發出奪命追魂call。