麥巴比7.16亮相皇馬　一種情況會改期

法國射手基利安麥巴比6月初已落實加盟皇馬，但仍未向呢支西甲勁旅報到，根據西班牙《阿斯報》爆料，皇馬將於當地時間7月16日喺主場巴拿貝球場舉行盛大歡迎儀式，正式介紹麥巴比來投。不過，如果法國奪得歐國盃冠軍，麥巴比亮相日子可能會改期。

據悉皇馬將會喺球場搭建一個舞台及一條「紅地氈大道」，畀麥巴比以王者姿態步上台，仲會放煙火及播音樂，排場似足美國著名女歌手Taylor Swift早前喺巴拿貝球場舉行演場會。

基利安麥巴比將會着住皇馬9號球衣上台，同現場8萬名球迷見面，會長皮里茲及一眾嘉賓亦會陪同左右。盛傳皇馬已經邀請法國球王兼前皇馬教練施丹擔任嘉賓，就如2009年皇馬簽入C朗，搵來葡萄牙傳奇射手尤西比奧出席儀式一樣。

不過，歐國盃決賽將於德國時間7月14日晚上舉行，如果法國捧盃，可能會舉行一系列慶祝活動，隨時同麥巴比亮相皇馬嘅歡迎大會撞期，屆時「銀河艦隊」或需要讓路，推遲舉行日子。