英格蘭大變陣　練習踢3中堅陣式

英格蘭喺歐國盃8強大戰瑞士前，領隊修夫基蘊釀進行大變陣，球隊周三(3日)進行操練嗰陣，突然演練3中堅陣式，似乎想出奇制勝。

英格蘭主打4-2-3-1陣式，不過16強對斯洛伐克加時戰，曾經改踢3-5-2。據英國《太陽報》報道，英格蘭周三練習再次演練3中堅陣式，不過喺祖迪比寧咸唔知使唔使停賽、勞基梳爾上陣成疑下，實際陣式仍有待落實。

報道指英格蘭喺馬克古希停賽下，3中堅會由基爾獲加、史東斯同安斯干沙出任，右翼衞就會係捷比亞或阿歷山大阿諾特，左翼衞就視為勞基梳爾可唔可以復出，目前計劃由布卡約沙卡客串。至於祖迪比寧咸目前受歐洲足協調查，如果被罰停賽，英格蘭會用艾雲東尼拍哈利卡尼做雙箭頭，若果可以上陣，祖迪比寧咸就會同菲爾科頓任進攻中場。

數據顯示，修夫基過去3份2比賽都係用4-2-3-1或者4-3-3，不過亦曾喺大賽期間改踢3中堅，包括上屆歐國盃決賽對意大利。