卻奧斯決戰皇馬3隊友　拒絕「被退休」

歐國盃東道主德國喺8強大戰西班牙，已宣布今屆賽事完結後退休嘅卻奧斯，嚟緊每一場都可能係告別戰，今場面對3位皇家馬德里戰友，卻奧斯表明唔想「被退休」，希望重演喺皇馬捧盃告別嘅故事。

卻奧斯即將退休，喺皇馬佢成功用歐聯冠軍作為告別禮物，今場歐國盃佢會對住西班牙3位戰友，包括祖斯盧辛馬田、拿祖費南迪斯同丹尼爾卡華積，祖斯盧賽前就講明：「我哋希望今場係卻奧斯最後1戰，比賽唔會因為佢而有咩特別，因為呢場係8強大戰。」

34歲嘅卻奧斯就大方回應：「我同祖斯盧好熟，我明白佢嘅意思，我唔會阻止佢有呢個希望，不過我會盡一切能力令佢呢個希望唔會成真。」對於德國嘅爭冠前景，卻奧斯表示：「喺皇馬，冇嘢可以好得過用歐聯冠軍告別，依家喺國家隊，我一定會嘗試再用冠軍嚟告別。」