羅馬尼亞效法日本　打掃更衣室獲讚揚

羅馬尼亞喺歐國盃16強吞荷蘭3蛋出局，呢個已經係佢哋近24年最好嘅國際大賽成績，可以話雖敗猶榮，而佢哋離開德國前，將更衣室打掃到一塵不染先至離開，文明舉動獲球迷大讚。

日本國家隊以往喺世界盃，因打掃更衣室而獲大讚，羅馬尼亞今屆亦有樣學樣，16強輸畀荷蘭後，仍然將更衣室整理到乾乾淨淨先至離開，而且仲留低一封信畀德國嘅賽事組委會。

羅馬尼亞嘅告別信入面寫：「每場比賽、每個激動時刻、每個經歷都令我哋更加團結，更加感受到足球嘅魔法，我哋可以無悔咁離開德國，感恩喺德國嘅呢段日子，好榮幸能夠成為歐洲足球大家庭嘅一份子。」