新老細下令裁員　曼聯同意減價出售拉舒福特

英國《太陽報》爆料，曼聯新股東拉特克利夫致力削減球會成本，開始進行裁員，唔止一般員工受影響，球星亦面臨被出售，上季表現嚴重走下坡嘅前鋒拉舒福特首當其衝，面臨被賣走。據悉曼聯願意減價，只要有球會出到6,000萬鎊(約6億港元)轉會費，就可以帶走呢位26歲射手。

曼聯曾經將拉舒福特標價為1億鎊(約10億港元)，但冇球會問津，甚至遭到唔少批評，認為紅魔鬼太高估「福仔」價值。拉舒福特上季各項賽事上陣43場僅入8球，對於前鋒而言，表現明顯唔合格，加上同領隊坦哈格關係破裂，所以曼聯惟有向現實低頭，只要接到6,000萬鎊報價，就會出售「福仔」。

不過，現時對拉舒福特有興趣嘅球會並唔多，最大潛在買家可能係巴黎聖日耳門，呢支法甲勁旅需要簽入前鋒，代替離隊嘅基利安麥巴比，但會唔會滿足曼聯6,000萬鎊轉會費要求，成為疑問。

另外，曼聯周三(3日)進行裁員，有250人離職，佔球會員工數目大約22%。