又有名帥去沙特掘金　皮奧利將執教伊蒂哈德

根據「轉會權威」記者羅曼諾(Fabrizio Romano)爆料，前AC米蘭教練皮奧利已經同伊蒂哈德達成加盟協議，將會同呢支沙特阿拉伯豪門簽約3年，成為最新一位去中東掘金嘅名帥。

伊蒂哈德上季聯賽僅排第5位，會方周三(3日)宣布同教練馬些路加拿度解約，並迅速斟掂皮奧利接任，預料短期內就會正式落實。據悉皮奧利獲得3年合約，年薪達到1,800萬歐元(約1.5億港元)，遠超執教AC米蘭嘅450萬歐元(約3,800萬港元)年薪。

現年58歲嘅皮奧利曾經執教博洛尼亞、國際米蘭、費倫天拿、拉素、AC米蘭等球隊，最威水係率領AC米蘭奪得2021/22年意甲冠軍。AC米蘭上季雖然排意甲第2位，但少冠軍國際米蘭19分，加上歐聯分組賽出局，所以會方仍然決定解僱皮奧利。