C朗射12碼心跳數據　證超強心理質素

葡萄牙球星C朗拿度今屆歐國盃表現受到批評，不過佢嘅無比鬥志同心理質素就冇人可以否定，16強對斯洛文尼亞佢因12碼宴客，一度激動痛哭，不過喺最後互射12碼階段，C朗承擔責任為葡萄牙射入第1個12碼，而佢當時嘅心跳數據曝光，更證明C朗超強心理質素。

C朗今屆每場比賽都配戴心跳監測器，開發儀器嘅科技公司WHOOP近日就公開C朗喺互射12碼期間心跳數據。喺加時賽結束同葡萄牙射贏12碼兩個時刻，C朗級得最高嘅180bpm(每分鐘心跳次數)，預備射12碼前逐步回落到140bpm，去到主射一刻就降至最低嘅100bpm，成功回復最冷靜嘅心情去射入。WHOOP公開數據形容：「C朗喺足球場上無所畏懼」。