歐國盃16強最佳陣容出爐　一個位置存爭議

歐國盃踢完16強之後，著名數據網站《SofaScore》根據球員表現評分，選出16強最佳11人陣容，但救出3球12碼嘅葡萄牙門將迪奧高哥斯達卻榜上無名，引起爭議。

根據呢個343陣容，鋒線上有西班牙「扭波王」尼高拉斯威廉斯，佢喺16強對格魯吉亞，射入1球及1次助攻。另外2位前鋒係荷蘭球員加普、唐耶爾馬倫，加普對羅馬尼亞，射入1球及1次助攻，唐耶爾馬倫梅開二度。

4位中場包括西班牙孖寶洛迪卡斯簡迪、法比安彭拿、瑞士國腳魯賓華加斯、法國翼衞祖利斯古迪。

3位後衞分別係16強入2球嘅土耳其中堅美列迪美羅，以及2位德國國腳魯迪格、尼高舒洛達碧克。

最具爭議係門將屬於奧比歷，雖然佢喺16強為斯洛文尼亞上陣對葡萄牙，有出色表現，包括撲出C朗嘅12碼，但葡萄牙門將迪奧高哥斯達更加搶鏡，包括加時下半場救出班捷文施斯高必入波，再喺互射12碼階段，撲出3球，成為晉級功臣，但評分反而唔及奧比歷高。