曼聯2位左閘變玻璃腳　坦哈格想翻兜利古朗

曼聯2位左後衞勞基梳爾、杜維爾馬拉西亞經常受傷，其中杜維爾馬拉西亞上季更加因傷，完全冇上陣，根據西班牙《阿斯報》爆料，紅魔鬼主帥坦哈格打算簽番上季向熱刺借用嘅利古朗，填補左路防線空缺。

由於勞基梳爾、杜維爾馬拉西亞受傷，曼聯上年夏天向熱刺借用利古朗應急，據悉坦哈格受到軍醫誤導，以為勞基梳爾、杜維爾馬拉西亞1月可以復出，所以1月就將利古朗還番畀熱刺，結果大失預算，杜維爾馬拉西亞繼續長抖之外，勞基梳爾亦喺2月再次受傷，提早收咧。因此，坦哈格希望今夏簽入左後衞，利古朗效力曼聯期間表現不俗，成為收購目標。

熱刺將28歲嘅利古朗標價為750萬鎊(約7,500萬港元)，價錢便宜，啱晒要節省開支嘅曼聯。不過，盛傳韋斯咸都加入爭奪利古朗，佢嘅身價隨時水漲船高。