英格蘭提出西甲案例　有望幫打甩比寧咸「不雅官非」

英格蘭中場祖迪比寧咸上場歐國盃16強對斯洛伐克，入波之後疑似做出不雅慶祝動作，面臨被歐洲足協罰停賽。不過，根據英國《太陽報》爆料，英足總以呢位中場曾於西甲做出類似動作，但非針對對手作為案例，有望幫佢打甩指控，唔需要停賽，最多罰款了事。

皇馬喺4月西甲以3比2反勝巴塞隆拿，祖迪比寧咸補時射入致勝1球，亦做出將手放近下體擺動嘅動作，但事後證明佢並非惡意攻擊巴塞球員，只係純粹自娛，西甲賽會亦冇罰佢停賽。英足總用呢單案例，向歐洲足協提出申辯，認為祖迪比寧咸當時慶祝動作並非針對斯洛伐克，不應受處罰。

事實上，2019年歐聯馬體會教練施蒙尼同當時祖雲達斯射手C朗，都曾經作出不雅慶祝動作，最後2人分別被歐洲足協罰1.7萬歐元(約14萬港元)及2萬歐元(約17萬港元)，估計比寧咸今次只會被罰5位數字款項，歐國盃8強對瑞士唔需要停賽。