曼聯內部人士承認：沙特出動國家力量搶般費

曼聯領隊坦哈格續約之後，可能要立即面對失去隊長般奴費南迪斯嘅難題，根據沙特阿拉伯媒體《arriyadiyah》爆料，有紅魔鬼內部人士承認，沙特主權基金公共投資基金(PIF)正在策動收購呢位29歲葡萄牙國腳，令球會管理層非常搶心失去重要支柱。

呢位不願透露姓名嘅曼聯內部人士話：「關於PIF要將般奴費南迪斯帶到沙特聯賽嘅傳聞係真實，但我唔可以講邊支球隊想簽佢，曼聯內部對於般費可能離隊感到憂慮，雖然管理層知道沙特方面出價十分吸引，令人難以抗拒，但同時明白留住般費對於球隊非常重要，加上坦哈格續約後，要求留用般費，管理層需要滿足佢要求。」

PIF已經收購4間沙特阿拉伯球會，包括艾納斯、希拉爾、伊蒂哈德、吉達艾阿里，如果般奴費南迪斯真係去沙特搵食，相信會加盟其中一隊。