迪布尼答應加盟伊蒂哈德　曼城慘遭「拆骨」

英超冠軍曼城面臨被「拆骨」，繼門將艾達臣摩拉斯有意轉投沙特阿拉伯豪門艾納斯之後，盛傳中場靈魂人物奇雲迪布尼亦已同另一支沙特勁旅伊蒂哈德，達成口頭協議，準備今夏加盟，令「藍月亮」可能一次過失去2位攻守主力。

根據英國各大傳媒爆料，伊蒂哈德已經派人同呢位33歲比利時國腳見面，奇雲迪布尼好滿意對方開出嘅合約條款，並達成口頭協議，願意今夏加盟伊蒂哈德。

奇雲迪布尼將於明夏約滿，佢早前曾透露有意去中東「掘金」：「我仲有1年合約，必須為將來打算，以我呢個年紀，必須對一切持開放態度，去沙特踢2年，可以賺到驚人薪酬，等於我近15年球員生涯人工總和。」據悉曼城並唔會阻止奇雲迪布尼離隊，因為佢係球隊史上最佳球員之一，必須尊重佢嘅決定。