阿仙奴動用2,700萬鎊　正式買斷大衞拉耶　

雖然大衞拉耶正為西班牙出戰歐國盃，但無阻阿仙奴近日正式官宣以2,700萬鎊(約2.7億港元)買斷佢，而拉耶亦相當識做，特登錄製短片感謝一班槍手球迷嘅支持。

大衞拉耶喺短片中向槍手球迷提到正式轉會後嘅感受：「租借1年後，我終於可以講我未來幾年，都會係阿仙奴球員，我非常期待新賽季，希望我哋可以一齊實現好多成就。非常感謝你哋給予嘅支持，希望好快就能見到大家！」至於阿仙奴主帥阿迪達則對拉耶留隊表示歡迎：「拉耶係球隊更衣室重要人物，好高興可以繼續同佢合作，有信心佢未來會持續進步。」

大衞拉耶現年28歲，2021年隨賓福特升上英超，憑住出色表現喺上季獲阿仙奴借用。嚟到成功搶贏蘭斯達爾正選位置，當中喺英超上陣32場，只係失咗16球，仲有16場保持清白之身，成為英超金手套獎得主。不過由於烏尼西蒙為西班牙1號門將，大衞拉耶今屆歐國盃只曾喺球隊提早出線之下，對阿爾巴尼亞出場1次。