表現受批評　科頓：我同比寧咸可以共存　

英格蘭喺今屆歐國盃成功殺入8強，不過整體表現令人失望，進攻主力菲爾科頓近日接受採訪，承認自己表現未如理想，但強調同祖迪比寧咸位置冇衝突，大家絕對可以喺場上共存。

英格蘭前場人才濟濟，不過暫時進攻發揮一般，16強面對斯洛伐克仲要去到補時階段先入波追平，當中菲爾科頓表現亦備受批評，呢名仲未開齋嘅曼城中場，受訪時就回應話：「老實說，目前對自己嘅表現有些沮喪，我想爭取入球，為英格蘭作出貢獻，但仍未能如願以償。不過我每場比賽都在進步，只需要繼續保持積極心態便可。」

領隊修夫基今屆歐國盃起用祖迪比寧咸為進攻中場，並將菲爾科頓擺喺左翼，間接令後者發揮未如理想，科頓承認個人最佳位置的確係中場中路，但唔同意自己同比寧咸無法共存：「過去一季喺曼城證明我更適合踢中場中，呢個位置令我取得更多入球。不過我覺得自己同比寧咸完全可以喺場上合作，共同為球隊作出貢獻。」