比寧咸不雅官非獲緩刑　土國鐵衞即停兩場

歐洲足協於周五（5日）宣布，英格蘭中場祖迪比寧咸因做出不雅慶祝動作罪成，雖然被判賽1場但獲緩刑，相反土耳其中堅美列迪美羅因行為不當，被罰即時停賽2場，命途迥異。

祖迪比寧咸喺上場歐國盃16強對斯洛伐克，入波之後渉嫌向對手後備席、女性工作人員，將手放喺下體擺動，再放到嘴邊嘅不雅動作，佢辯稱只係向在場朋友開玩笑，歐洲足協就此事作出裁決，罰款3萬歐元(約25萬港元)同停賽1場，不過停賽唔係即時執行，有為期1年嘅緩刑期，若果再犯先要坐波監，即係周日（7日）凌晨8強對瑞士可以披甲，都算執番身彩。

相反土耳其後衞美列迪美羅就冇咁好彩，佢在歐國盃16強對奧地利之役，做出含政治訊息嘅「狼式」慶祝手勢，歐洲足協指佢利用體育運動作出非體育性質嘅行動，有損賽事聲譽，判罰佢坐2場波監，即時執行，意味住佢最快都要決賽先可復出，即係益晒周日（7日）凌晨佢哋8強嘅對手荷蘭，土耳其足總已就事件提出上訴。