不幸擺烏龍出局　維頓漢宣布退出國家隊

在歐國盃16強完場前擺烏龍輸畀法國之後，比利時37歲中堅維頓漢周五(5日)在個人社交網宣布退出比利時國家隊，並獲得比利時足總確認。

其實維頓漢嗰球烏龍只係唔好彩，當時高路梅安尼近門起腳撻Q，省中維頓漢改變方向入網，維頓漢避都避唔切成為出局罪人。

維頓漢當然唔係因為呢個烏龍而退出國家隊，而係佢真係年紀大，佢喺社交網留言：「由第1場到最後1場，感謝所有回憶，我實現夢想。」

比利時國家隊亦向維頓漢告別：「由練習場到球場，你向我哋展示，成為一名真正紅需要咩條件，我哋會掛住你。」

維頓漢於2007年首次代表比利時，至今17年共上陣157次，錄得10入球6助攻，最佳成績係2018年世盃季軍。維頓漢同安德列治約滿，現時係自由身，如果新球季冇班落，就會結束球員生涯。