法國運動戰0入球　迪甘斯解釋換麥巴比原因

法國喺歐國盃躋身4強，不過球隊嘅攻擊力備受質疑，佢哋今屆5場比賽只入3球，當中2球係烏龍波、1球係12碼，成為歐國盃史上首支運動戰0入波而入4強球隊。王牌前鋒基利安麥巴比喺加時被換走，領隊迪甘斯解釋換人係麥巴比主動要求。

法國雖然有麥巴比、基沙文、奧士文尼迪比利等星級前鋒，不過今屆就硬係唔識入波，目前只有麥巴比對波蘭射入過12碼，另外2個入球都係靠對手擺烏龍。事實上法國創造唔少機會，今屆有89次攻門(第3)同21次命中龍門(第4)，可惜轉化唔到入球。法國能夠晉級靠防守，5場比賽只失1球12碼，同樣未喺運動戰期間失守。

麥巴比今場表現淡靜，加時下半場開始前更被換走，連12碼都唔準備射，領隊迪甘斯賽後解釋：「佢好疲倦，肌肉頂唔順，加時上半場我見佢已經好辛苦，麥巴比向來好誠實，換入新血係好正常。」麥巴比亦表示自己喺加時已筋疲力盡，所以主動向迪甘斯要求換人。