卻奧斯遺憾掛靴　告別戰變茅王走甩紅牌

德國喺歐國盃之旅8強結束，早已宣布歐國盃後掛靴嘅中場卻奧斯，足球生涯最後一戰遺憾收場。呢位踢法瀟灑嘅傳球大師，喺告別戰竟然變身「茅王」，踢傷柏迪之外又曾踩踏拉明耶馬，最後只拎1張黃牌真係執到，西班牙領隊富安迪亦直指卻奧斯理應被逐。

34歲嘅卻奧斯喺皇家馬德里用歐聯冠軍告別，可惜喺德國隊未能捧盃做退休禮物，完場後一臉落寞，佢賽後表示：「老實講我依家最大感受係德國隊嘅出局，我哋希望實現偉大嘅目標，但一切都幻滅。我好開心可以幫德國足球重燃希望，呢隊波未來一定會成功，但呢一刻係非常難過。」

卻奧斯今場踢法突然變得粗野，開波早段就踢傷柏迪，冇幾耐之後亦曾踩落拉明耶馬腳面，但呢兩腳連黃牌都冇，直到下半場先因技術犯規被罰黃牌，西班牙領隊富安迪賽後表示：「卻奧斯對柏迪嘅犯規應該係紅牌。」

卻奧斯足球生涯踢咗832場比賽，喺球會同國家隊奪冠無數，包括6次歐聯冠軍、4次西甲冠軍、3次德甲冠軍，另外仲幫德國贏過2014年世界盃冠軍，足以令佢名留青史。