西班牙慘勝！柏迪嚴重膝傷　2大將4強停賽

西班牙喺歐國盃8強加時擊敗德國，不過晉級亦付出非常沉重代價，比賽早段傷出嘅柏迪證實左膝內側扭傷，今屆餘下賽事無緣再戰。西班牙仲有丹尼爾卡華積尾段食紅牌，連同中堅拿洛文特因累積黃牌，都要喺4強對法國停賽，形勢不容樂觀。

柏迪係西班牙中場大腦，但開波7分鐘被卻奧斯粗暴犯規受傷，離場嗰陣更眼泛淚光，西班牙證實佢左膝內側扭傷，將要接受進一步檢查，但《阿斯報》記者就指柏迪將休戰至少3個星期，今屆剩低賽事都唔會有機會再次上陣。

西班牙同時亦出現停賽問題，中堅拿洛文特今場再拎黃牌，加上右閘丹尼爾卡華積喺最後階段2黃1紅被逐，2位主力都會喺4強停賽，西班牙今屆正選陣容有4個缺陣，對球隊後備力量係一大考驗。