歐國盃18戰0入球　湯馬士梅拿遺憾告別

德國喺歐國盃8強止步，除咗卻奧斯掛靴之外，另1位34歲老將湯馬士梅拿亦好大機會最後1次參加呢項大賽，呢位拜仁慕尼黑進攻中場曾於世界盃累積入10球，但踢歐國盃卻一直啞火，總共上陣18次仍然食白果，成為球員生涯一大遺憾。

湯馬士梅拿今屆賽事上陣時間極少，包括首場分組賽對蘇格蘭，74分鐘後備入替穆斯亞拿，之後3場比賽都全場做觀眾，直至今場8強等到80分鐘再次後備上陣，換言之2場比賽合共大約只有30分鐘表演，自然難有建樹。

事實上，湯馬士梅拿近年已淡出國家隊，加上穆斯亞拿、科利安華迪斯等中場新星冒起，一般估計佢應該唔會參加2年後世界盃，更加唔好講4年後下屆歐國盃，賽後梅拿亦承認今場好大機會係佢最後1次為德國披甲。

湯馬士梅拿總共為德國上陣131場入45球及41次助攻，包括喺世界盃累積入10球，當中以5球獲得2010年世界盃神射手，但佢喺歐國盃累積上陣18次，卻冇波入，只有2次助攻，猶如中咗魔咒。