耶馬助攻創紀錄　曾被美斯沖涼傳承魔法？

西班牙喺歐國盃8強2比1擊退東道主德國，16歲新星拉明耶馬再次交出助攻，目前以3次助攻成為今屆助攻王，創下歐國盃歷史紀錄。賽前網上瘋傳一張「浴照」，係BB耶馬獲球王美斯幫手沖涼，唔少網民笑稱「耶馬BB仔已傳承美斯足球魔法」！

耶馬上半場助攻丹尼爾奧莫入波，繼對克羅地亞同格魯吉亞後，今屆第3次交出助攻，成為歐國盃史上第1個20歲以下交3次助攻球員，亦以16歲358日之齡，成為國際大賽(世盃及歐國盃)史上，最年輕喺8強上陣同最年輕助攻球員。

賽前網上瘋傳一張耶馬嘅「浴照」，相片來自2007年一本慈善月曆，相入面有啱啱出世未夠1歲嘅BB耶馬坐喺浴盤內，而阿根廷「球王」美斯就同人一齊幫佢沖涼，網民笑稱耶馬細細個就有美斯祝福，傳承足球魔法。