法國無名英雄　邁治蘭4場「零封」破紀錄

法國今屆歐國盃鋒線啞火，「運動戰0入波」仍然入到4強，門將邁治蘭功不可沒，呢位效力AC米蘭嘅29歲鋼門，今屆5場比賽都踢足全場，其中4場保持不失球，成為法國隊史上單屆歐國盃最多「零封」門將，絕對係球隊無名英雄。

法國擁有基利安麥巴比等多位進攻好手，但偏偏入波數字極少，5場3個入球之中有2球係烏龍波、1球係12碼。幸好防線夠穩陣，特別係邁治蘭今場8強對葡萄牙，屢救險球，包括戰至60至62分鐘，123秒內連續撲出般奴費南迪斯、域天拿、C朗極具威脅射門，否則法國能否晉級，仍然係未知之數。邁治蘭今屆唯一失波係對波蘭，被羅拔利雲度夫斯基射入12碼。

身高1米91嘅邁治蘭唔止把關技術出眾，而且好有「冠軍命」，曾經協助里爾爆冷奪得2020/21年法甲冠軍，轉投AC米蘭後，捧埋2021/22年意甲冠軍，加上係法國贏2021年歐國聯冠軍成員，法國有呢位「幸運星」助陣，可增添奪取今屆歐國盃冠軍勝算。