【有片】馬連奴福地絕殺　複製爸爸33年前慶祝

西班牙喺歐國盃8強大戰德國，喺加時賽嘅第119分鐘絕殺，入波嘅中場米基爾馬連奴似乎係「天選之人」，佢爸爸33年前亦曾喺今仗嘅球場入波，馬連奴更複製佢爸爸當年嘅經典慶祝動作，相當有意思。

效力皇家蘇斯達嘅馬連奴喺80分鐘先上陣，結果喺最後一擊接應丹尼爾奧莫傳中頂入，佢入波後瘋狂慶祝，更走去角球旗繞圈後振臂高呼。原來馬連奴爸爸安祖都曾經踢西甲，1991年安祖為奧沙辛拿踢歐洲足協盃，對史特加入波後做出呢個慶祝動作，33年後囝囝喺同一個球場入波，就做番同樣慶祝致敬。

https://x.com/i/status/1809311658134946025　

馬連奴賽後表示：「呢個球場(平治球場)係我哋嘅福地，我爸爸都係呢度入波，呢個球場同我哋一家好特別。」安祖賽後亦向西班牙媒體講笑：「佢個慶祝令我睇落好肉酸，佢已經超越咗我，因為喺斯圖加特入波唔再係我專利！依家我要保持沉默，畀馬連奴一個擁抱同吻，佢值得擁有呢一切！」