意義重大！修夫基今晚領軍第100戰

英格蘭將於周日(7日)凌晨歐國盃8強對瑞士，今仗係「三獅兵團」主帥修夫基率領國家隊第100場比賽，別具意義。翻查修夫基之前99場比賽，取得60勝23和16負，並且剛好累積起用99位唔同球員。

雖然修夫基戰術部署備受批評，但其實佢領軍成績唔差，勝出率達60%，攻入209球，失68球，其中國際大賽淘汰賽累積7勝，多過之前14位「三獅兵團」領隊總和，包括2021年首次打入歐國盃決賽，以及晉級2018年世界盃4強，屬於自1990年之後首次。

修夫基來到「百戰里程碑」遇上瑞士，算係有運行，因為英格蘭對上一次輸畀瑞士，已經係1981年，雙方近5次對賽，法定時間英格蘭取得4勝1和，如果計埋互射12碼，「三獅兵團」更加全勝。