「撲左邊」！比克福特貓紙有料到

英格蘭喺歐國盃8強互射12碼5比3淘汰瑞士，門將比克福特撲出文路爾艾簡治第1射係決定性。賽後比克福特水樽上面嘅「貓紙」曝光，瑞士4個12碼入面，有3個都被英格蘭貼中，比克福特亦跟隨指示「撲左邊」，救出關鍵嘅12碼。

根據貓紙上面嘅指示，瑞士3位劊子手文路爾艾簡治(撲左邊)、法比安舒哈(扮撲右邊、撲左邊)同梳頓沙基利(撲左邊)都被睇穿，只有安杜尼(撲左邊地波)「貼錯」。比克福特4球入面有3次跟隨指示去做，2次捉啱路並救出1球，成為英格蘭晉級英雄。

Opta數據顯示，比克福特喺大賽互射12碼，近14球撲出4球，證明佢哋做功課冇白費心機。為英格蘭射入致勝12碼嘅阿歷山大阿諾特賽後話：「比克福特一開始嘅神救，令我哋更加有信心，我哋呢排練好多12碼，今屆賽事成日都要加時，近年嘅大賽冠軍都會面對12碼，我哋會做好準備。」