英格蘭破28年魔咒　變身12碼專家　

英格蘭喺國際大賽一直受12碼魔咒纏擾，今屆8強互射12碼淘汰瑞士，係佢哋自1996年後首次喺歐國盃射贏晉級，而且5個劊子手全部射入晒，英格蘭領隊修夫基賽後表示陣中有多位劊子手，球隊已變身「12碼專家」。

英格蘭自1996年歐國盃8強12碼淘汰西班牙後，之後喺歐國盃4次互射12碼都輸波，包括上屆決賽對意大利飲恨。不過英格蘭近年情況好轉，連埋歐國聯同世界盃在內，近4次互射12碼第3次贏出，今場就算首席劊子手哈利卡尼喺加時被換走而冇份操刀，英格蘭一樣5射全中。

高爾彭馬、艾雲東尼等前鋒喺球會都係12碼專家，早前有數據顯示，英格蘭國腳上季喺球會射12碼，入球率高達97.5%。領隊修夫基賽後表示：「我哋依家有更多常規嘅12碼球員，但佢哋都要展示出冷靜一面，而且仲有門將要作出撲救，球隊先有機會晉級。」