荷蘭每10年威1次　朗奴高文自認「小國」

荷蘭喺今屆歐國盃前唔好太多人睇好，不過佢哋就愈戰愈勇，連續兩輪淘汰賽都喺90分鐘內解決對手晉級，數據顯示佢哋對上一次喺歐國盃淘汰賽2連勝(90分鐘)，就係1988年捧盃嗰一屆，似乎係奪冠吉兆。

荷蘭近年表現浮浮沉沉，但每隔10年都會威一次，佢哋對上一次喺歐國盃入4強係2004年，對上一次喺國際大賽入4強就係2014年世界盃，今屆相隔多10年又入國際大賽4強，領隊朗奴高文表示：「今屆對荷蘭國民非常特別，我哋只係個小國，但依家同英格蘭、西班牙、法國一齊入4強，實在非常光榮。」

荷蘭將會喺4強大戰英格蘭，佢哋對上一次喺國際大賽交鋒，已經係1996年歐國盃分組賽，當時英格蘭大勝4比1，不過朗奴高文今次信心十足，更揀定決賽希望遇見嘅對手：「對英格蘭會係兩支歷史球隊對決，肯定精彩，如果畀我揀決賽對手，我會希望係西班牙，因為分組賽已經對過法國，不過依家先要努力戰鬥贏出準決賽。」