荷兰每10年威1次　朗奴高文自认“小国”

荷兰喺今届欧国杯前唔好太多人睇好，不过佢哋就愈战愈勇，连续两轮淘汰赛都喺90分钟内解决对手晋级，数据显示佢哋对上一次喺欧国杯淘汰赛2连胜(90分钟)，就系1988年捧杯嗰一届，似乎系夺冠吉兆。

荷兰近年表现浮浮沉沉，但每隔10年都会威一次，佢哋对上一次喺欧国杯入4强系2004年，对上一次喺国际大赛入4强就系2014年世界杯，今届相隔多10年又入国际大赛4强，领队朗奴高文表示：“今届对荷兰国民非常特别，我哋只系个小国，但依家同英格兰、西班牙、法国一齐入4强，实在非常光荣。”

荷兰将会喺4强大战英格兰，佢哋对上一次喺国际大赛交锋，已经系1996年欧国杯分组赛，当时英格兰大胜4比1，不过朗奴高文今次信心十足，更拣定决赛希望遇见嘅对手：“对英格兰会系两支历史球队对决，肯定精彩，如果畀我拣决赛对手，我会希望系西班牙，因为分组赛已经对过法国，不过依家先要努力战斗赢出准决赛。”