比寧咸拒被調走？蝦碌鏡頭揭修夫基換人問題

英格蘭喺歐國盃8強對瑞士一仗，下半場出現奇怪一幕，當瑞士入波領先後，修夫基曾一口氣換3個球員，但被換走嘅球員當中竟然有王牌球星祖迪比寧咸，呢位中場見到後一臉疑惑唔肯出場，擾攘一輪後先改變換人人選，令球迷懷疑比寧咸拒絕被換離場。

78分鐘英格蘭作出3個換人，號碼顯示比寧咸、明奈同捷比亞被換走，連歐洲足協官網都列出3個調動，不過比寧咸就唔想離開，同球證交涉後，英格蘭最終改為換走安斯干沙。據報今次事件係因為第4球證「舉錯牌」，比寧咸並唔係修夫基想換走嘅球員，但《The Athletic》記者安卡就指事件揭露修夫基換人嘅問題。

安卡表示：「比寧咸知道自己唔係被換走嘅球員，證明調動係賽前已經預先安排定，而唔係根據比賽實際情況，而作出改變戰局嘅最佳決定。」英格蘭喺加時下半場再換入艾雲東尼同阿歷山大阿諾特射12碼，似乎亦係「公式化」換人，修夫基嘅調動能力自然受到質疑。