修夫基領軍100戰里程碑　一項紀錄史上最強

修夫基執教英格蘭第100場比賽，有驚無險憑互射12碼淘汰瑞士，打入歐國盃4強，令一直批評「修哥」戰術嘅球迷啞口無言。事實上，修夫基擔任「三獅兵團」以來戰績不俗，根據《Stats Foot》統計，佢領軍出戰12場歐國盃，常規比賽時間(包括加時)取得7勝5和，成為賽事史上累積最多不敗場數嘅主帥。

包括加時在內(互射12碼當和)，英格蘭上屆歐國盃7戰取得5勝2和，其中決賽打和意大利1比1，最後互射12碼失落錦標，至於今屆踢咗5場獲得2勝3和。

除此之外，修夫基2次帶領隊英格蘭進身歐國盃4強，已經等於歷任「三獅兵團」主帥總和。「修哥」寧願悶悶哋咁贏，好過過足癮咁輸，或者可以協助英格蘭打破58年錦標荒。