祖雲達斯同意出售基艾沙　價錢抵到爛

根據「轉會權威」記者羅曼諾(Fabrizio Romano)爆料，祖雲達斯已決定出售翼鋒費達歷高基艾沙，由於呢位26歲意大利國腳只剩下1年合約，祖記為求盡快甩手，以免佢明夏自由身走人，令球會人財兩失，所以只要求2,500萬歐元(約2.1億港元)轉會費，就可以帶呢位「星二代」。

據悉祖雲達斯之所以要出售費達歷高基艾沙，除咗因為佢即將約滿之外，亦由於新教練莫達嘅組軍藍圖並冇佢嘅位置，加上會方早前豪花5,150萬歐元(約4.37億港元)收購阿士東維拉中場杜格拉斯雷斯，需要賣走部分現有球員，減輕財政壓力。

費達歷高基艾沙4年前由費倫天拿加盟祖雲達斯，首季上陣43場入14球，並成為意大利奪得上屆歐國盃冠軍嘅功臣，但近年因為傷患問題，表現走下坡，上季意甲上陣33場入9球。

費達歷高基艾沙有份為意大利出戰今場歐國盃，但4次上陣冇入波亦冇助攻，盛傳曼聯、利物浦有興趣簽入佢。