「細麥」加盟里爾　下屆歐聯有望鬥大佬

法國球星基利安麥巴比約滿離開巴黎聖日耳門(PSG)，轉投皇馬之後，佢嘅細佬伊當麥巴比同樣以自由身離開PSG，但並非去其他聯賽，而係加盟另一支法甲球隊里爾。由於里爾可以參加下屆歐聯外圍賽，意味兩兄弟有望喺歐聯碰頭。

基利安麥巴比2017年加盟PSG，伊當麥巴比亦跟隨大佬入「門」加入青年軍，上季獲提升上一隊，但各項賽事僅上陣5次，潛力唔及「大麥」，加上基利安麥巴比同PSG不歡而散，所以「細麥」約滿後，PSG亦冇挽留，畀佢自由身離隊。

現年17歲嘅伊當麥巴比日前正式同里爾簽約3年，並揀選「大麥」出道初期着嘅29號球衣，佢話：「我呢個年紀最好留喺法國成長，里爾係最佳選擇，佢哋係法甲其中一支最佳球隊。」里爾過往成為唔少優秀進攻球員登入大球會嘅踏腳石，包括夏薩特、拉菲爾利亞奧、域陀奧森漢，話唔定伊當麥巴比將來可以追隨「大麥」步伐，加盟豪門。