格連活特現身曼市操練　有望留效紅魔鬼？

盛傳曼聯將於今夏出售上季被外借去基達菲嘅格連活特，呢位22歲翼鋒近日現身曼徹斯特，自己進行操練，未知曼聯會方是否會改變主意，留用呢位新星。

據悉格連活特上周五(5日)約埋前曼聯隊友梳泰亞一齊租用球場練波，每小時租場費用為100鎊(約1,000港元)，格連活特嘅爸爸兼經理人亦有在場，相信格連活特想保持狀態，迎接曼聯開操。

不過，格連活特是否可以留喺曼聯，仍然有好大變數，雖然佢上季被外借去基達菲期間表現出色，上陣36場入10球及6次助攻，但紅魔鬼方面仍然擔心佢「家暴男」形象會破壞球隊聲譽，所以傾向出售呢位翼鋒。

曾經傳出祖雲達斯、巴塞隆拿有意收購格連活特，基達菲亦想續借，至於格連活特最終情歸何處，相信兩個月內有定案。