曼聯隊友羨慕吧　雲迪碧克將投基羅納踢歐聯

曼聯開始清洗「冗員」，根據「轉會權威」記者羅曼諾(Fabrizio Romano)爆料，紅魔鬼已經搵到買家接收雲迪碧克，西甲「神奇球隊」基羅納同意以50萬歐元(約420萬港元)收購佢，意味呢位27歲荷蘭球星唔止可以結束4年曼聯生涯噩夢，下季仲可以踢歐聯。

雖然雲迪碧克今次固定轉會費只係50萬歐元，但曼聯可以根據佢為基羅納上陣次數，收取浮動轉會費，估計起碼會獲得額外500萬歐元(約4,200萬港元)收入。基羅納將於未來1星期同雲迪碧克傾個人待遇條款，相信達成協議機會極高。

雲迪碧克2020年夏天以3,500萬鎊(約3.5億港元)轉會費由阿積士加盟曼聯，但表現未如理想，長居後備，總共上陣62場入2球，並曾經被外借去愛華頓及法蘭克福，早已唔屬於領隊坦哈格組軍計劃之內，加上曼聯新股東拉特克利夫要求出售副選球員，改善財政，雲迪碧克被清洗，並唔令人意外。

唔少網民恭喜雲迪碧克可以脫離「魔」掌，下季有歐聯踢，反而曼聯下季只能踢歐霸盃。