不滿球證偏幫　3萬德迷聯署要求重賽

歐國盃東道主德國喺8強被西班牙淘汰，不過賽事中有爭議判決，西班牙左閘古古列拿喺加時期間禁區內手球，但英格蘭球證安東尼泰萊拒判12碼，成為德國出局關鍵。有球迷喺請願網站發起重賽要求，已獲得超過3萬球迷聯署支持。

有德國球迷喺請願平台「Change.org」提出重賽，入面提到「安東尼泰萊執法明顯不公！古古列拿禁區內清晰手球，但德國未獲應得嘅12碼......安東尼泰萊已被其他球證批評偏幫西班牙，所以我哋要求歐洲足協安排重賽，同埋調查安東尼泰萊嘅中立性並向佢作出處罰。」

請願開始2日就有3.1萬球迷簽名支持，當然歐洲足協安排重賽機會近乎零，就連處罰安東尼泰萊亦冇乜機會，《ESPN》指歐洲足協認同安東尼泰萊判決正確，歐國盃前球證獲解釋手球指引，古古列拿類似嘅手球正正就係例子，指引話當球員隻手係垂直指向地面，就唔會被判手球，安東尼泰萊只係跟足指引去吹。