莫拉達暗示歐國盃後退役　望有美滿結局

西班牙今屆歐國盃表現被指最有冠軍相，不過作為箭頭嘅艾華路莫拉達只有1個入球，表現受到唔少批評，呢位31歲老將喺4強對法國前表示，今屆歐國盃後可能會退出國家隊，希望告別前會有美滿結局。

莫拉達表示：「今屆好大機會係我最後一次踢國際大賽，我想有個最好嘅結局，決賽周之後我多數會退役，呢個只係一個可能性，我依家唔想講太多。」莫拉達為西班牙上陣78場入36球，係國家隊史上第4入波多球員，距離第3位嘅費蘭度托利斯(38球)只差2球。

莫拉達喺馬德里體育會嘅前景同樣未明，早前佢就拒絕沙特阿拉伯球會斟介，但近日有傳獲AC米蘭等意甲球會垂青，莫拉達就話：「足球世界冇嘢係肯定，我想留喺馬體會，不過有時事情會好複雜，尤其我喺西班牙經常受到批評。」