艾雲東尼No Look極刑　練12碼有特別方法

英格蘭喺歐國盃8強互射12碼淘汰瑞士，射入第4輪嘅艾雲東尼一向係12碼專家，不過佢今次用嘅「No Look」射法就令球迷震驚，甚至連英格蘭隊友都佩服。據報艾雲東尼平時練12碼，仲有一套特別嘅練波方法！

艾雲東尼喺加時下半場入替哈利卡尼，其中一個原因就係佢嘅12碼能力，當佢主射嗰陣，全程望住瑞士門將恩尼森馬，連眼尾都冇望過個波，但依然可以精準命中。英格蘭隊友布卡約沙卡表示：「好癲！我哋都好佩服，點解可以唔使望個波？佢操練已經係咁樣做。」左閘勞基梳爾亦話：「難以置信，特別係睇重播，有個鏡頭只係影住佢個樣，(唔望個波)真係好瘋狂。」

統計顯示，艾雲東尼歷來射過31球12碼，當中只有1次宴客紀錄，據報呢位賓福特前鋒有個特別嘅練習方法，就係平時會練13碼而唔係12碼，當佢完全適應之後，比賽嗰陣射12碼就會覺得個龍門更大。