加拿大唔係1人球隊　艾方素戴維斯「進化」

今屆美洲盃最驚喜球隊，絕對係首次參賽即入4強嘅加拿大，呢支北美洲球隊陣中最大牌球星，係效力拜仁慕尼黑嘅艾方素戴維斯，加拿大亦被視為佢嘅「1人球隊」，不過自從馬殊上任後，艾方素戴維斯再度進化，以隊長身份領導團隊合力作戰，成績更佳。

23歲嘅艾方素戴維斯攻守兼備，以往「一腳踢」主宰球隊，但自馬殊喺5月執教後，艾方素戴維斯就進化成團隊領袖，並且擔任國家隊隊長，馬殊表示：「佢唔再覺得自己需要參與球隊每一個攻勢，佢明白到踢好自己個角色，將自己做到嘅嘢做到最好，就係對球隊最大嘅幫助。」

艾方素戴維斯今屆做咗好多防守工作，21次重奪控球權係今屆美洲盃最多球員，對於要同阿根廷爭逐決賽，艾方素戴維斯表示：「我哋要付出所有，分組賽對阿根廷我哋踢得好，但拎唔到想要嘅勝利，我哋對勝利非常饑渴、前所未有咁饑渴！」