雲佬同曼聯已簽約　現身卡靈頓基地

曼聯名宿雲尼斯達萊新球季重投紅魔鬼，將會擔任領隊坦哈格副手，據報雙方已簽約，周一(8日)正式開工，傳媒影到佢抵達卡靈頓基地，為新球季作準備。

「轉會專家」羅曼諾報道，48歲嘅「雲佬」已同曼聯簽約，合約為期兩年，加入坦哈格教練團，擔任助教，並指呢位前荷蘭國腳獲其他球隊邀請擔任主帥，但佢仍然決定重返奧脫福。預計曼聯將會官宣「雲佬」回歸，同佢加盟曼聯一齊仲有幸運薛達原主帥雷尼哈克。

英國傳媒影到「雲佬」乘車抵達卡靈頓基地，據報係同曼聯開會，討論今季轉會策略，「雲佬」將會負責曼聯前鋒訓練，佢仲同曼聯收購目標博洛尼亞嘅約舒亞舒克斯通過電話，只要曼聯收購順利，兩人有機會在新球季合作。

此外，格連活特亦在訓練基地出現，至於查頓辛祖亦冇得延遲歸隊，喺佢向坦哈格道歉之前，唔可以跟大隊操練，亦不能使用飯堂。