堤亞高艾簡達拿宣布掛靴：多謝足球！

西班牙中場堤亞高艾簡達拿周一(8日)宣布，正式結束16年職業足球生涯，呢位33歲中場近年因傷患問題長期養傷，上季只係踢過1場比賽，早前約滿利物浦後決定提早掛靴。

效力過巴塞隆拿、拜仁慕尼黑同利物浦，堤亞高艾簡達拿嘅技術同創造力都屬頂尖，但加盟利物浦4季不斷受傷，上月約滿回復自由身，周一更喺社交網宣布：「我好樂意回饋足球畀我嘅一切，感恩經歷呢段日子，我非常享受。多謝足球、多謝所有陪伴我、幫助我成為更好球員嘅人，再見！」

堤亞高艾簡達拿曾46次代表西班牙國家隊，拎過4次德甲冠軍同4次西甲冠軍，效力利物浦4年贏過1次英足盃冠軍，上季佢因傷長抖，今年2月輸畀阿仙奴一仗曾上陣踢5分鐘，呢場亦成為佢足球生涯最後一戰。