迪甘斯寸爆反擊悶波指控：唔鍾意就咪睇！

法國喺歐國盃殺入4強，將會同西班牙爭逐決賽資格，雖然佢哋擁有基利安麥巴比、基沙文、奧士文尼迪比利等攻擊球星，但今屆5場比賽仍然未試過運動戰入波，被批評踢法沉悶。法國領隊迪甘斯日前霸氣回應悶波指控，直言「唔鍾意就咪睇！」

法國今屆5場比賽入3球失1球，防守性踢法令戰情沉悶，不過迪甘斯就認為呢種踢法令球隊贏波機會更大：「如果我哋踢波悶親你，你可以去睇其他嘢，我哋唔介意。今屆歐國盃比較特別，入球比正常少，但我哋依家有機會令法國人開心，其他人悶唔悶我唔在乎。」

基利安麥巴比同基沙文以往係法國入球泉源，但今屆腳風唔順而受批評，拉比奧特亦為隊友護航：「我哋會盲目咁信任佢哋兩個，因為佢哋係可以一己之力改變比賽嘅人，法國需要麥巴比同基沙文。」