拉舒福特拒絕離隊　提早加操博翻身

早前傳出曼聯願意以6,000萬鎊(約6億港元)出售前鋒拉舒福特，並引起沙特阿拉伯豪門伊蒂哈德注意，提出收購佢。不過，根據英國傳媒最新消息，拉舒福特已拒絕離隊，並提早2星期自己加操，希望提升狀態，新一季證明實力。

據悉伊蒂哈德曾經接觸拉舒福特嘅哥哥兼經理人，討論簽入「福仔」可能性，但遭到拒絕，因為拉舒福特認為自己仍然當打，現階段唔會考慮去沙特搵食，而且自己忠於曼聯，希望一直效力紅魔鬼。

曼聯周一(8日)開操，拉舒福特亦有現身接受體測，原來佢2星期前已經自己進行體能訓練，可見佢非常有決心爭取新一季重回顛峰水準。

另外，上季被外借去多蒙特嘅查頓辛祖，並冇參加曼聯季前操練，盛傳佢好大機會轉投祖雲達斯。