麥巴比除面罩都唔掂：我踢得好失敗！

法國喺歐國盃4強黯然出局，王牌球星基利安麥巴比今場首度除低面罩，並且交出助攻幫法國先開紀錄，可惜佢嘅射門依然唔順，最終1比2落敗出局。麥巴比賽後失望承認：「我踢得唔好，今屆歐國盃好失敗！」

麥巴比2年前喺卡塔爾世盃以8球成為神射手，歷來踢14場世盃入12球，不過喺歐國盃就判若兩人，今屆只憑12碼入過1球，過往9場歐國盃只入1球。麥巴比今場4次射門都冇入波，下半場曾經錯失黃金機會，麥巴比表示失望：「我當時過人同推波都好順，覺得應該要入球，至少要射中龍門，但最後射高，呢個就係足球殘酷現實。」

麥巴比賽後承認自己表現失敗：「西班牙值得晉級決賽，足球只係分踢得好同踢得唔好，我係踢得唔好。原本目標係做歐洲冠軍，同埋喺歐國盃有好表現，但兩個目標都失敗咗。呢個球季非常漫長，我要好好休息一下，之後開始新生活。」