【有片】柏迪都O嘴！耶馬驚天金球1年前預演

西班牙神童拉明耶馬喺歐國盃鋒芒畢露，4強對法國轟入嘅驚天金球，令全球球迷為之驚嘆，就連因傷坐後備席嘅柏迪都被影到睇到「O嘴」。原來耶馬呢個入波，喺1年前嘅U17歐國盃已經出現過，當時又係4強、對手又係法國，歷史重演！

西班牙今場率先落後，展開急攻但未能突破法國防線，直至耶馬右路扣大位左腳轟入世界波，先為西班牙吹起反勝號角。上場重傷嘅柏迪見到佢嘅巴塞隆拿隊友入靚波，忍唔住雙手抱頭，擺出「O嘴」表情，相信唔少球迷都有相同反應。

耶馬1年前「預演」金球：https://twitter.com/i/status/1810760954801746275　

耶馬呢個入波絕非撞彩，佢喺上年5月U17歐國盃4強對法國入波，過程就同今場世界波非常相似，同樣係右路拎波後推入中間，再用左腳轟入死角，唔同嘅係當時西班牙反輸1比3，今次耶馬入波之餘仲成為贏家，殺入歐國盃決賽。