球迷又搞事!莫拉達無辜受傷踢決賽成疑

2024年07月10日 10:15
東網電視
更多新聞短片
保安捉球迷期間誤傷莫拉達。(Getty Images)
西班牙擊敗法國殺入歐國盃決賽,完場後又出現球迷闖入球場搞事場面,而且更連累西班牙隊長艾華路莫拉達被保安鏟傷,據報呢位前鋒膝頭扭傷,決賽可唔可以上陣成為疑問。
當比賽完結後,西班牙一眾球員圍埋慶祝,突然有球迷衝入球場搞事,而保安喺捉人期間跣低,變成飛鏟踢向艾華路莫拉達。艾華路莫拉達被踢中後表現痛苦,更雙手抱住右腳膝頭,其他隊友都走去慰問,涉事保安亦即時向佢道歉。
西班牙領隊富安迪表示:「我哋要等聽日再檢查,但唔預期會有乜問題,佢覺得好痛,希望一切都OK。」據西班牙《馬卡報》同《阿斯報》報道,西班牙隊醫初步檢查後,已排除嚴重受傷嘅可能性。
今屆歐國盃已經唔止一次出現類似畫面,之前葡萄牙比賽亦有球迷闖入球場搵C朗影相,保安捉人期間亦唔小心踢傷干卡路拉莫斯。