美斯入波！阿根廷又踢決賽　大賽3連冠叫胡

周三(10日)朝早美洲盃4強，阿根廷憑祖利安艾華利斯同美斯各建一功，2比0輕取加拿大晉級決賽。美斯今場入波再改寫多項紀錄，但最重要係佢離冠軍只差1步，有望繼21年美洲盃、22年世盃稱王後，實現國際大賽3連霸偉業。

美斯喺8強對厄瓜多爾射失12碼，幾乎成為罪人，今場佢表現活躍有多次埋門。阿根廷上半場由祖利安艾華利斯先開紀錄，50分鐘安素費南迪斯射門，美斯龍門口加一腳射入，拎到今屆個人第1個入波，亦係美斯第6屆美洲盃取得入球，阿根廷最終贏2比0晉級。

今場入波係美斯國際賽生涯第109球，超越伊朗傳奇戴伊(108球)成史上第2位，僅次於C朗拿度嘅130球。阿根廷邁向國際大賽3連霸，美斯賽後表示：「呢支球隊嘅成就真係難以置信，美洲盃唔易踢，我哋要面對強大對手、緊密賽程同好差嘅場地，入決賽唔簡單，我哋要行埋最後一步。」