方丈好小器！古古列拿被德國球迷狂噓

西班牙喺歐國盃4強對法國期間，左閘古古列拿每次拎波，現場都會出現極大噓聲，因為唔少德國球迷認為，西班牙喺8強淘汰德國一仗，古古列拿嘅手球未判12碼係關鍵，所以將怨氣發洩喺古古列拿身上。

對於古古列拿慘成德國球迷出氣袋，西班牙中堅丹尼爾維維安表示：「對古古列拿發出噓聲令人羞恥，我唔明白呢啲人個腦諗乜，點解要入球場去噓一個球員。」西班牙領隊富安迪亦表示：「我唔知點解球迷要噓古古列拿，但呢個行為會激發佢踢得更好，我反對所有唔尊重其他人嘅行為，相信呢啲球迷並唔代表德國社會。」

效力車路士嘅古古列拿今屆表現突出，同尼高拉斯威廉斯喺左路合作無間，佢就懶理球迷噓聲，專注爭奪冠軍：「我哋1個月前懷住冠軍夢想嚟德國，雖然受咗好多苦，但全隊好似家人咁一齊作戰，我哋值得留喺度，好好享受呢場決賽。」