球迷想施丹出山 迪甘斯扯火回應炒魷問題

2024年07月10日 12:53
東網電視
更多新聞短片
迪甘斯今屆保守戰術受到批評。(Getty Images)
球星如雲嘅法國喺歐國盃4強出局,而且整體表現喺水準以下,領隊迪甘斯就飽受批評,出局後唔少球迷希望施丹出山執掌國家隊帥印,而迪甘斯被問到帥位問題,就扯晒火咁回應。
今屆被怒插踢悶波嘅迪甘斯,賽後被問到會唔會帶隊踢下屆世盃,呢位55歲教頭就扯火表示:「你問(法國足總)主席...我啱啱輸咗場準決賽,你覺得我應該答你?我尊重你,唔該你都尊重其他人。我好冷靜話你聽,發生咗嘅事改變唔到,我係嚟回答問題,但係唔會答你呢條問題,你好清楚主席點諗,其實你根本唔應該問。」
法國足總主席戴路喺歐國盃前,曾表示今屆賽事成績,唔會影響迪甘斯嘅帥位。雖然迪甘斯嘅12年法國主帥生涯可能會繼續,但唔少法國球迷就頂唔順,呼籲98年世盃冠軍英雄施丹出山,呢位前皇家馬德里教練自2021年開始,一直未有執教任何球隊。